Alex Amalfi di ODINSA: “Sodo y inteligencia di centenares di persona awe ta comberti den calidad di bida pa tur ciudadano”

0
272

ORANJESTAD – Un di esnan cu a hiba palabra diabierna anochi durante inauguracion di brug nobo riba Spaans Lagoen tabata Alex Amalfi, director financiero di ODINSA N.V. El a expresa cu e compania ta wak e culminacion di e brug manera e cumplimento di su deber caminda a traha schouder cu schouder cu companianan local enfrentando e retonan, pero tambe protehando e zona natural. Di nan parti ta contento di ta participa den e proyecto y esaki ta apenas e comienso di un relacion largo.

“Despues di enfrenta varios reto tecnologico, fisico y natural hunto cu yen di otro persona, no solamente di nos parti, di DOW, di e empresanan di servicionan publico, di Setar, di Elmar, di WEB, di Polis; awe nos tin e obra magnifico aki cu ta un realidad cu ta bay compaña e Arubianonan pa hopi aña,” Amalfi a expresa na e miles y miles di persona cu a bini diabierna anochi na e ceremonia riba e brug.

El a continua bisando cu e ta kere cu “a bale la pena tur e tempo y dedicacion aki pasobra no solamente nos a haya un obra funcional cu ta bay permiti e transporte y comunicacion entre e ciudadanonan, pero ademas ta un obra cu ta embeyece e ya bunita isla aki. Pa nos ta un orguyo cu un brug di nos ta pone net aki,” e ehecutivo a bisa. Consecuentemente el a splica cu e brug tin 92 meter di largura y su construccion a cuminsa na februari di 2016.

Amalfi: “Esaki tabata un gran desafio tecnico, no djis dor di e condicionnan di e suelo, pero dor di e cuido di flora y fauna cu ta biba aki. Den dje a traha centenares di persona; nan sodo y inteligencia awe ta comberti den calidad di bida di tur e ciudadanonan.” Pa ODINSA esaki ta djis e comienso di un relacion largo den cual ta spera cu durante e hopi añanan di mantencion di e brug y tur e obranan di Green Corridor, ta cumpli cu e proposito pa cual nan a ser traha.

Amalfi a finalisa invitando e publico pa sigui disfruta di e celebracion y a pone e structura na disposicion di e autoridadnan local.

LEAVE A REPLY

Please enter your comment!
Please enter your name here