Cayanan di San Miguel a haya asfalt despues di casi 70 aña

0
134

 

 

ORANJESTAD – Prome Minister Mike Eman diamars atardi tabata di bishita den e diferente cayanan di San Miguel pa mira e trabounan cu a inicia pa asfalta e cayanan. “Nos ta hopi contento cu door di e trabounan aki nos por a cumpli cu e bario despues cu e famianan pa decadanan largo a biba den un bario sin caminda asfalta,” Eman a bisa despues di a mira e area unda cu e siman aki ta wordo asfalta.

Cu un abraso cordial Prome Minister Mike Eman a wordo ricibi door di sra. Maria Tromp, un habitante di edad di San Miguel. “Mike hopi danki,” el a expresa na e mandatario, despues cu el a mira cu DOW a caba di scrap e caminda, preparando pa esaki wordo asfalta. “Na momento cu e caminda ta cla lo mi bolbe bishita mama y mi lo sinta bebe un koffie pa nos combersa,” e mandatario a priminti sra. Tromp.

E señora di edad a corda cu el a casa na aña 1949 y a muda pa e bario aki unda tabatin solamente tres cas. Cu transcurso di tempo, poco-poco e bario a desaroya cu construccion di diferente cas. Pero pa loke ta infrastructura, nan a keda atras den e casi 70 aña. “Semper nos a biba cu e stof. Ta ora awa yobe, nos tin trankilidad, pero otro momento ora cu e stof lanta, henter e cas ta keda tapa pa stof. Bo por bari y pisa cuanto liber di stof ta saca pafo. Bo por haci limpi cuanto cu bo kier, e cas semper ta keda yen di stof. Pesey awo mi ta hopi contento, Dios dunami bida pa mi por disfruta di dje y mi kier a bisa Mike hopi danki”

E ta un pensamento cu su yiu muhe, Marina Tromp, ta comparti. Tabata recientemente cu e bisiñanan a uni, despues cu den pasado a haci algo similar, y a manda un peticion pa Minister di Infrastructura pa asfalta e camindanan. Nan a haya bishita di Prome Minister Mike Eman, kende hunto cu su team a scucha e preocupacion pa e tantisimo stof y scuridad, Marina a conta. Mientrastanto e bario a ricibi luz y awor e asfalt a yega. “E situacion tabata uno horibel, pasobra bo ta haci cas limpi awe, y ya atardi cas ta yen di stof. Tin ora no tin ni gana di haci cas limpi pasobra no ta bale la pena. Henter nos bida nos a biba den e stof aki,” el a bisa. Awo cu ta yega un fin na e situacion aki e ta hopi contento. “Nos ta hopi contento, pasobra ta hopi aña nos a biba asina. Nos ta contento cu nos a haya asfalt. Si nos haya klinkers pa embeyece nos area aki mescos cu otro barionan, nos lo keda mas contento ainda” Marina Tromp a expresa. Nan a expresa di ta contento na Mike Eman y Benny Sevinger cu a scucha nan peticionnan.

Ya caba mayoria di e caya di San Miguel cu ta keda na e banda di Sasaki a wordo asfalta den e siman cu a pasa, y aworaki ta trahando na e “afwerking” na banda di caminda.

LEAVE A REPLY

Please enter your comment!
Please enter your name here