Ciudadano di Rancho: “Mi ta contento y e famia ta prepara pa bin Mambo Beach bek”

0
2837

ORANJESTAD – E momento den cual Minister President Mike Eman y Minister di Infrastructura Benny Sevinger a presencia inicio di demolicion di ex Bushiri Hotel, ta un acto a hala atencion di un publico grandi diaranson mainta. Entre e personanan, tabata presente Jose Cesareo Olivier, un conocido ciudadano di e bario di Rancho. Olivier a comparti su sentimento y recuerdonan di con pueblo tabata disfruta di e area den famia y su satisfaccion cu Gobierno a opta pa trece esaki bek.

“M’a tende e noticia y mi a para akinan pa mi wak si ta berdad cu nan ta bay basha e Bushiri aki,” asina e ciudadano a bisa contando cu esaki tabata unda e tabata landa antes, tempo e luga tabata yama ‘Mambo Beach’. “Defunto Consuelo, mama di Leo Quandt nan’ki cu tabata biba eybou y nos semper, den un grupo famia cu mi mama y otro rumannan, nos ta coi jug, nos ta bin coba santo blanco y pone e jug pa e awa keda friu,” Olivier a declara puntrando su mes si tin hende sa haci esey ainda.

Na su opinion e momento a yega pa basha Bushiri abou y pa drecha e beach bek pa e hendenan di Rancho y e bicindario di Playa Pabou. Esaki ta hustamente e argumento cu a hiba Gabinete Mike Eman II na tuma e decision di deshaci di e edificio den ruina y entrega pueblo bek pa su gozo.

Pero no ta solamente nos hendenan local ta bay haya un beach bek, turismo tambe ta gana. E rehabilitacion di e beach ta caba cu un mahos bista y ta ofrece nos bishitantenan crucero un luga cerca di waf caminda por disfruta di nos solo y lama apenas algun minuut leu.

Olivier ta hopi optimista pa futuro. “Ban spera tur cos bay bon. Ta hopi aña caba; awo cu e decision a cay, mi ta contento cu esaki.” E ta cla pa reanuda e tradicion familiar di pasa momentonan grato na beach y a expresa cu dia di e apertura e lo tey claba. “Con bo laga; sigur cu si! E famia ta prepara pa bin aki bou bek,” e meneer a bisa wantando man di su nieto.  

LEAVE A REPLY

Please enter your comment!
Please enter your name here