Dr. Horacio Oduber Hospital ta un berdadero hospital di 5 strea cu un cuido medico di cinco strea

0
1227

ORANJESTAD- Prome Minister Mike Eman hunto cu su colega di Salubridad dr. Alex Schwengle a haya un recorido extenso den e departamento nobo di Dr. Horacio Oduber Hospital. Nan a wordo compaña pa director medico di dr.HOH Ezzard Cilie, coordinadornan di construccion, miembronan di board, varios specialista y nursenan. E departamento nobo ta impresionante y ta cumpli realmente cu deseo di Prome Minister Eman, un hospital di 5 strea. Tur cu tabata forma parti di e recorido a keda fascina pa e avance grandi y modernisacion di e parti nobo aki di dr.HOH. E edificio nobo ta consisti di un piso abou (begane grond) y cuatro piso mas. Ta spera cu pa prome di augustus por cuminsa pasa e pashentnan over pa e prome cuatro departamentonan. Riba di 5 piso ta bay bin e cuido intensivo cu ainda no ta completamente cla.

Spoedeisende Hulp tin actualmente 7 camber pa trata pashent, un camber di traige y un gipskamer. Pashentnan cu ta yega cu ambulance awor ta pasa via e wachtkamer drenta e SEH. Mescos ta ora pashentnan cu ta yega di urgencia y mester saca potret (rontgen) mester bay e departamento pasando den e gang cu masha poco privacidad. E parti di privacidad aki a haya hopi prioridad den e SEH nobo. Na di prome lugar e cambernan a bira 17 pa atende cu pashent. Esaki ta haci e tempo di espera cu tin tanto keho riba dje, hopi menos tambe.  Tin un camber di detox ora un pashent drenta cu ta traha cu gasnan quimico peligroso. Tambe tin tres camber unda ta saca X-ray si esaki ta necesario y unda por haci intervencion medico chikito. Pashentnan di accidente/trauma cu ta yega cu ambulance no mester pasa mas via e wachtkamer ya cu esaki ta sosode via un entrada cera. E departamento di gips ta amplia cu un lugar extra.  E lugar ta espacioso cu tur loke ta necesario den un SEH moderno. Mescos ta e caso cu e departamento di ginecologia y obstetria. Tin hopi espacio pa privacidad y a tene cuenta cu delaster un situacion cu por surgi. Banda di cambernan di duna luz via e manera ‘normal’ den e departamento nobo tin tambe e oportunidad pa haya baby den un badkuip. Un asina yama ‘onderwater bevalling’ cu ta aplicabel na varios pais na mundo. Na di dos piso tin e Kinderfdeling cu tur comobidad pa tanto e pashentnan chikito como nan mayornan.

E di tres piso tin e departamento unda entre otro ta atende pashentnan cu tin un enfermedad of trauma neurologico y unda tambe e stroke unit ta situa mescos tambe un centro di revalidacion. Cu masha orguyo e zorgmanager a anuncia cu siman pasa 4 nurse a slaag pa nan diploma di neuro verpleegkundige cu no solamente ta algo unico den Caribe, pero cu a wordo duna dor di dr. HOH mes den cooperacion cu Amstel Academie, e instituto di educacion di VUMC (Vrije Universiteit Medisch Centrum). Di 4 piso ta igual cu esun di tres pa pashentnan di Interne Geneeskunde y Cardiologia.

Prome Minister Eman tabatin masha interes pa tende tur loke ta bay cambia y tabatin varios pregunta al caso riba e situacion nobo cu dentro di poco ta drenta na vigor. Loke e tabata kier sa ta awor cu tin un hospital di cinco strea, con esaki ta bay den concordancia cu e calidad di cuido cu ta wordo duna y e calidad di educacion di e personal. El a haya di biaha un bon splicacion di tanto dr. Schwengle como director di dr.HOH Cilie y tambe e specialistanan y zorgmanagernan presente. Hospital ta constantemente trahando riba un miho calidad di cuido.  Ta traha den cooperacion cu Amstel Academie pa duna cursonan di nivel halto y e personal medico ta wordo someti cada tanto tempo na un inspeccion riba nan trabou dor di un visitatiecommissie cu ta mantene su mes na reglanan vigente.

LEAVE A REPLY

Please enter your comment!
Please enter your name here