Famia Maduro, entre otro na Pos Chikito cu ta contento cu stof no lo ta un problema mas

0
137

Nan ta gradici Prome Minister Eman y Gobierno

ORANJESTAD – “Cuarenta aña mi a warda cu mi a come stof, pero ayera mi por a habri mi porta di cushina,” asina Jozef Ciriaco Maduro, habitante di Pos Chikito a bisa publicamente. E ta otro ciudadano mas cu si ta kere cu asfalt, klinkers y lus por haci un cambio den bida pa miho. Adicional na tur e trabounan cu ta tumando luga den e bario danki na e proyecto di Green Corridor, Gabinete Mike Eman tambe a percura pa varios caya di Pos Chikito a haya e asfalt cu nan tabatin decadanan wardando riba dje.

Maduro, su casa y famia a pidi pa haya e oportunidad di por gradici Minister President Mike Eman personalmente y e mandatario a logra hinca esaki tambe den su agenda ocupa di trabou. Tabata un satisfaccion puro pa Premier Eman di por a presencia e alegria di e famia aki y nan bisiñanan. “Contento cu nos por a cumpli cu un deseo atrobe di un cantidad di famia na inicio di Pos Chikito. Pa nos ta algo importante ora nos por haci inversionnan cu ta hisa e calidad di bida di e hendenan,” Eman a expresa.

Prome Minister a tende for di Sr. Maduro con pa hopi aña mester a biba cu bentana cera y stof tabata haci nan bida menos agradabel, pero awo e no tin nod’i di bari veranda y  por habri bentana libremente. “Mi deseo a wordo cumpli,” Maduro a bisa. Esaki ta un storia cu ta ripiti na diferente otro districto di Aruba, for di Noord pa San Nicolas y pesey Gabinete Mike Eman I y II a logra haya y maneha e recursonan di e manera mas eficiente posibel repartiendo e trabounan na diferente punto di e isla.

“Mescos cu e parti di mehoracion di calidad bida y ponemento di caretera, otro parti cu nos ta tende hopi di dje den pueblo y cu ta cumpliendo cu ne tambe ta iluminacion publico. Awe e compromiso cu famianan di Pos Chikito ta cu esey ta bay yega tambe,” Minister President a laga sa. Esaki ta otro alegria pa esnan cu e atardi ey a ricibi e mandatario den nan bario. Sr. Maduro a bisa: “Nos ta contento cu e Gobierno aki, hopi contento. Cu Dios su poder nan t’ey pa par di aña mas.”

LEAVE A REPLY

Please enter your comment!
Please enter your name here