Hobennan di SVT a finalisa entrenamento militar cu exito na Savaneta Kamp

0
111

E hobennan di grupo 11 awo ta sigui fase di cursonan y stage

ORANJESTAD – Nan ta bin di diferente bario di Aruba y ta varia den edad, pero diabierna mainta nan tabatin algo importante en comun y esey ta un sinti masha grandi di satisfaccion y orguyo di a completa nan entrenamento militar como parti di e trayecto di Formacion Social. E fase aki ta conoci como un di esnan mas exigente ya cu e ta condiciona e participantenan fisicamente, pero tambe ta inculca e base principal di nan cambio integral, cu ta e aspecto di disciplina. Miembronan di Grupo #11 Sociaal Vormingstraject (SVT) a pasa un examen cu a dura un siman, consistiendo di ehercicionan tanto den mondi, como den awa y tambe riba e tereno di Marinierskazerne na Savaneta.

Na final e cansancio extremo tabata bisto riba nan cara, pero tambe por a nota un determinacion fuerte; esaki ta hustamente e valor cu lo yuda e hobennan aki yega na e metanan nobo cu nan a fiha pa nan mes, esta di cambia e rumbo di nan bida pa bira ciudadanonan responsabel y productivo di nos comunidad. Teniente Richard Kelly di Arumil a felicita nan tur elogiando e esfuerzonan fisico y mental cu nan a duna pa alcansa e prome logro di nan trayecto pa un miho futuro. Ademas di disciplina, e hobennan a siña con pa traha den ekipo y respeta autoridad; cosnan cu ta asina importante ora cu kier avansa na pia di trabou.

Director di Oficina di SVT, Jessy Ras tambe a expresa un satisfaccion y orguyo enorme di wak e muchanan di Grupo #11 alcansa e punto aki di nan trayecto. Ras a indica tambe cu esaki ta e grupo mas grandi di hoben cu a completa e entrenamento militar y entre su integrantenan tin un hoben cu den pasado ya a yega di inicia e trayecto y bandon’e, pero a bin purba di nobo y e biaha aki si a logra caba cune. E resultado positivo aki ta danki tambe na e apoyo psicologico, spiritual y emocional cu e hobennan ta ricibi for di e ekipo di profesional di SVT cu ta inclui trahador social y pastor.

SVT ta un proyecto cu Prome Minister Mike Eman a inicia durante su prome Gabinete y tabata posibel danki na e cooperacion di Ministerio di Defensa di Hulanda, Enseñansa pa Empleo y companianan local. E ta dedica na ofrece un oportunidad na hobennan cu a perde nan rumbo den bida, cu no a caba scol of no ta traha. For di dje a sali hopi hoben cu tabata riba caya, activo den gang y te hasta cu a cay cera, pero cu awendia tin trabounan digno, nan tin elogio di hefe y coleganan y ta hiba bidanan honrabel.

E siguiente momento importante pa e hobennan di Formacion Social ta bin e siguiente siman ora cu nan lo ricibi barret for di e Comandante di Marinierskazerne indicando asina di manera oficial, e culminacion di trayecto na e base militar. Esaki ta un ceremonia cu ta conta cu presencia di mayornan y otro sernan stima di e participantenan. SVT su siguiente grupo di hoben pa rehabilita ta cuminsa den luna di februari 2018, pero for di awo caba ta registrando posibel participantenan. Pa mas informacion por acudi na oficina di SVT na Marinierskazerne, yama na 522-5352, of bishita e pagina di Facebook: Formacion Social SVT caminda por wak hopi potret y video di e diferente fasenan di e trayecto.

LEAVE A REPLY

Please enter your comment!
Please enter your name here