Idea di Gobierno pa construi verkeersdrempel ta tremendo y mester wordo poni rond Aruba

0
275

ORANJESTAD – E maneho di Gabinete Mike Eman pa frena velocidad den areanan di hopi vivienda of dilanti scolnan a yega den area di Ponton. Diamars anochi e team di trahadonan di DOW tabata den Caya Tuturutu y a haya bishita di Prome Minister Mike Eman, pa gradici nan pa e esfuersonan cu ta haci trahando den oranan di anochi pa marduga, pa cumpli cu deseo di habitantenan.

Den bishitanan cu Eman ta haci semanalmente den barionan di Aruba, semper ta scucha kehonan manera autonan cu ta core duro den areanan di vivienda, pues no riba e area di caminda grandi so. E mandatario a scucha e kehonan y a combersa cu DOW pa mira con por yuda frena coremento duro di auto den barionan. E solucion presenta tabata “verkeersdrempel” (of verkeerplateau) cual a wordo diseña door di e profesionalnan di DOW. A traha un presupuesto y por bisa cu e aña’ki ta construyendo rond di 50 “verkeersdrempel”. E siman aki a toca turno na Ponton di cual un, esun di Caya Tuturutu ta cla caba.

Wim Steenhuis tabata un di e habitantenan presente, kende tabata masha contento cu construccion di e “verkeersdrempel” den e caya unda cu e ta biba. “Mi ta na fabor di e construccion aki sigur, pasobra e caminda aki ta wordo uza manera un pista di careda y cu no tabatin accidente grandi ainda ta un suerte cu nos tin,” el a bisa. E tipo di instrumentonan aki di trafico ta algo cu mester wordo poni riba mas caminda pa yuda den e trafico. El a bisa cu no mester lubida cu trafico ta sigui crece, tur hende tin pura pa yega nan destinacion y e “verkeersdrempel” ta un bon instrument pa frena e velocidad. “E ta bon pa siguridad den trafico y pa esnan cu ta biba, cana y core den e bisindario.”

E maneho di Gobierno pa construi “verkeersdrempel” na diferente area ta algo cu Steenhuis ta bisa di ta apoya. “E ta algo cu mester a cuminsa ayera mes tur rond Aruba, ya cu e ta beneficia siguridad den trafico. Tin hende cu por tin un opinion contrario riba esaki, pero nan lo mester adapta nan mes na e situacion aki,” el a termina bisando.

LEAVE A REPLY

Please enter your comment!
Please enter your name here