MFA ta un joya di proyecto pa duna servicio na comunidad di Santa Cruz y bisindario

0
170

ORANJESTAD – Pa Minister di Infrastructura Benny Sevinger, dialuna ultimo tabata otro ocasion special caminda cu a haci di un vision, un realidad. “Nos ta para aki pa pone prome piedra di MFA Santa Cruz, un vision cu a cuminsa cu Gabinete Mike Eman I unda cu Prome Minister a bisa cu nos mester por duna servicio mas cerca di pueblo y asina ey a cuminsa crea MFA den diferente bario pa e pueblo por haya servicio mas cerca di unda nan ta biba.”

Sevinger semper caba ta atrae pa e aspecto di construccion. Como e titular encarga cu departamentonan manera DOW, su aporte na e realisacion di e vision ta balioso. Gobierno a busca diferente arkitecto rond di Aruba, na Noord, Paradera, Santa Cruz, Savaneta, San NIcolas y awo tambe na Dakota. Hunto cu e arkitecto, e ekipo di maneho di MFA bou guia di Omar Harms ta pasa rond pa sinti kico e comunidad kier den su MFA.

Despues di esey ta keda na InfraTeam y DOW pa realisa e parti di destaho cu ta determina cua ta e contratista local pa haci e trabou. Den e caso di MFA Santa Cruz, e arkitecto ta Ghisberto Figaroa y e contratista BIC Aruba N.V. E proyecto ta dura 220 dia di di trabou, sin conta e dianan liber, pesey ta stipula cu e construccion ta keda cla na luna di maart 2018.

Santa Cruz no ta bay ta un proyecto facil, segun Minister Sevinger. E ta bisa esey basa riba e nocion cu esaki ta e MFA cu a conoce mas dificultad pa loke ta trata su tereno. “Tabatin un reto grandi pa arkitecto Figaroa, pa tene cuenta hunto cu DOW riba awa cu ta core, unda e ta situa y su nivelnan,” Minister a indica. “Mirando e diseño, nos no tin duda cu atrobe ta un joya di proyecto nos ta bay tin den Santa Cruz pa duna servicio na comunidad di Santa Cruz y bisindario.”

E mandatario a felicita pueblo di Santa Cruz cu e proyecto aki, pero tambe ta felicita e arkitecto, Stichting Onroerend Goed Aruba (SOGA), e contratista, comision di MFA, e empleadonan di Hulpbestuurskantoor y por ultimo Prome Minister pa su vision y empuhe. “Sin duda nos lo ta bek aki 220 dia pa nos ricibi e yabi y pasa e yabi over na e director y cuminsa duna servicio na comunidad di Santa Cruz. Awo e trabou ta bay cuminsa,” Sevinger a finalisa bisando y ofreciendo su asistencia y colaboracion na e contratista unda cu bira necesario.

LEAVE A REPLY

Please enter your comment!
Please enter your name here