Minister di Asuntonan Economico Richard Arends orguyoso y satisfecho 
Na presentacion di e proyecto piloto di cultivo di algae for di CO2

0
449

ORANJESTAD- Minister di Asuntonan Economico Richard Arends tabata un di e invitadonan durante presentacion di e pilot project di cultivo di algen riba tereno di RDA. Un cultivo cu ta bay haci uzo di e emision di CO2 cu ta wordo recogi ora e planta ta den funcion. Un proyecto fabuloso cu ta den man di TNO Caribe, den concordancia cu CITGO, RDA y gobierno di Aruba,. Ya caba a haci varios test cua ta e algae cu mas facil por crece na Aruba y esaki a resulta di ta spirulina, un micro-algae cu ta crece lihe den e condicionnan di tempo cu Aruba tin.

Minister Richard Arends “Ta yena mi cu hopi orguyo y satisfaccion di ta aki y ta testigo di e pilot project  di e micro-algae refinery. Mi ta wak bek algun aña atras durante mi bishitantenan na Hulanda hunto cu Prome Minister Eman, kende tabatin esaki como su vision. Despues nos a logra durante negosacionnan convence CITGO pa participa activamente den e vision aki. E ta algo unico. Un innovacion hopi grandi pa loke ta trata Aruba. Manera semper mi kier menciona cu nos a identifica  4 sector nobo. Un di nan ta tecnologianan limpi. Tin 5 area di inversion, 5 area di oportunidad. Un di nan ta e area rond di e refineria cu no ta wordo uza door di CITGO. Nos a mira con ya caba ta haciendo uzo di e parti aki. Algun luna pasa e solar panel park di WEB NV a inicia aki y awor e proyecto di micro-algae refinery.”

Arends ta bisa cu aki por mira con por combina tecnologianan limpi cu un economia convencional y un industria energetico. Aki por mira con nan dos ta complementa otro. “Esaki ta oportunidadadnan cu nos tin nos dilanti, mescos cu tin oportunidadnan den e areanan industrial, infrastructural y esnan rond di waf di Barcadera y esun di Playa y e area rond di hospital. Aki na e area di CITGO tambe ta un di oportunidadnan y awe nos ta testigo di esey.”

TNO Caribe a descubri caba un algae cu por wordo cultiva aki cu ta crece facil bou e condicionnan atmosferico perfecto. Arends ta masha orguyoso cu un bes mas Aruba ta logra crea un industria paralelo na e industria energetico, un industria di tecnologia limpi. “Esaki ta brinda oportunidadnan na empresanan y tambe pa nos studiantenan cu kier bin bek pa traha den e industria aki. Nos  ta creando e triangulo di labor, di actividadnan economico y di e actividad di educacion.” Aruba un bes mas ta riba plataforma internacional , ta e ehempel pa mundo canando cu pasonan firme den un futuro di industria innovativo.

LEAVE A REPLY

Please enter your comment!
Please enter your name here