Prome Minister Eman ta tene su discurso nacional Di loke a logra y kico ta e perspectivanan pa e siguiente periodo

0
336

ORANJESTAD- Un dia prome cu eleccion Prome Minister di Aruba Mike Eman ta tene su discurso nacional den cual e ta papia un poco riba e periodo di gobernacion tras di lomba y ta enfoca riba e periodo di gobernacion nos dilanti.  Gabinete Mike Eman I y II a sirbi comunidad di Aruba durante ocho aña y durante e periodo aki hopi a wordo logra na bienestar di pueblo di Aruba.

Gobierno a introduci e plan di energia pa haci Aruba menos dependiente di petroleo. Vision di gobierno ta pa na 2020 e isla aki ta completamente sostenibel.

  A percura pa reapertura di e refineria unda hopi hende a haya trabou y de futuro hopi mas ta bay haya trabou. Esaki ta bon pa tanto e comunidad, pero sigur tambe pa economia di Aruba. Proyectonan grandi infrastructural manera Green Corridor, Watty Vos Blvrd, reconstruccion y ampliacion di dr. HOH, mudamente di waf di container pa Barcadera, remodelacion  di e waf crucero, mehoracion di barionan den e sentido mas amplio di palabra ta algun di e tantisimo proyectonan cu e gobierno aki a cumpli cu nan.

E idea ta cu tur loke haci mester ta enfoca den haci Aruba sostenibel pa famianan, medio ambiente y desaroyo economico. Pa e siguiente periodo di gobernacion 2017-2021 tin plannan grandi pa bay wordo ehecuta. Asina gobierno kier pa prosperidad yega cerca tur hende. Eman ta bay enfoca riba e tema aki mescos tambe riba finanzas publico y con esaki ta bayendo y kico kier logra riba e tereno aki den e periodo di gobernacion nos dilanti. Claro cu Eman ta toca tambe temanan manera economia y su diversificacion. Un topico hopi al caso ta criminalidad y siguridad cu ta haya atencion di Prome Minister. Ta sigui reduci crimen y percura asina pa crea barionan sigur. Cuido medico ta un otro topico cu ta hunga un rol importante den e bida diario di tur hende na Aruba y sigur nos grandinan. Medio Ambiente sin duda ta haya atencion special di Prome Minister Eman, kende – mescos su gobierno – ta reconoce e importancia di biba y traha den un ambiente limpi. Esaki ta na bentaha di nos mes y turismo tambe.

Educacion ta e yabi cu ta habri portanan tur caminda rond mundo. Un bon educacion ta e instrumento mas poderoso cu un persona tin pa transforma su bida y crea un bida di calidad pa su mes y su famia.  Educacion ta un punto esencial pa e siguiente periodo di gobernacion. Un di e puntonan riba e tema educacion ta studiefinanciering. Gobierno a percura caba pa trece cambionan bentahoso pa loke ta studiefinanciering y lo trece mas cambionan positivo pa e studiantenan di Aruba. Ta bay introduci e sistema di longlife learning cu ta na bienestar di e persona mes y su doño di trabou. Varios punto mas ta bin dilanti durante e discurso nacional di Prome Minister Eman.

LEAVE A REPLY

Please enter your comment!
Please enter your name here