Prome Minister Mike Eman sumamente contento cu Dakota a haya su mini cancha di futbol

0
292
????????????????????????????????????

ORANJESTAD – Alegria a reina na Centro di Bario y Deporte Dakota (CBDD) diahuebs atardi na momento cu a realisa e apertura oficial di mini cancha di yerba artificial pa practica di futbol. Centro di Bario Dakota ta e di cinco punto riba e isla pa ricibi e facilidad aki despues di Centro di Bario Brazil, RCA, Bushiri y Madiki.

Directiva a hinca un programa den otro cu a inclui discurso di President di Hunta Directiva di CBDD, Jair Oduber expresando e importancia di un facilidad asina pa henter e bario, en particular pa e muchanan cu ta warda su apertura cu hopi emocion.

Pa rindi honor na un persona cu ta un baluarte di e bario, un leyenda di futbol local y cu te dia di awe ta un pilar di e centro di bario, a dedica e cancha na Sr. Jubi Richardson. Esaki tabata visiblemente un momento hopi special pa Sr. Richardson.

Tres mucha di di seleccion infantil di futbol a scop bala hunto cu Prome Minister Mike Eman y di e manera ey a haci e apertura oficial di e cancha. Despues di esaki Premier Eman a hiba palabra pa tur esnan presente expresando su satisfaccion di wak con otro cancha ta cla y grandi y chikito di e bario ta disfruta di dje. Hunto cu Eman tabata presente Minister di Husticia Arthur Dowers y Minister di Asuntonan Economico, Richard Arends.

E mini canchanan cu yerba artificial ta un iniciativa di Minister di Asuntonan General Mike Eman bou coordinacion di Ditto Acosta di oficina BoBario. E proyecto ta posibel danki na e patrocinio di e Programa Olympamerica di e Organisacion Deportivo Panamericano atrabes di Comite Olimpico Arubano bou presidencia di Sr. Roy Mezas.

E proximo canchanan cu lo keda cla ta esun na Arsenal diabierna mes sigui pa dialuna na La Fama. Asina lo sigui tambe otro canchanan na Cura Cabai Zuid, Washington y Ayo.

LEAVE A REPLY

Please enter your comment!
Please enter your name here