Raymundo Kelly honra cu cancha na Centro di Bario Ayo Despues di camindanan asfalta y iluminacion awo Ayo tin su mini turf tambe

0
1527

ORANJESTAD – Un otro veld mini turf a keda cla, e biaha aki den bario di Ayo. Un bario unda cu e ciudadano Raymundo Kelly a dedica su bida na hiba deporte mas cerca di muchanan di bario. Esey ta motibo tambe cu na momento cu Prome Minister Mike Eman a inaugura e cancha aki diaranson atardi, a wordo anuncia cu e lo hiba e nomber di Raymundo Kelly, presidente saliendo di Centro di Bario Ayo y bisindario. E mini turf na Ayo ta e di tres cu a keda inaugura e luna aki despues di Dakota y Arsenal, mientras cu diahuebs atardi La Fama tambe a habri esun di dje oficialmente.

Raymundo Kelly a recorda cu CBAB a wordo funda na 1981 y for di prome momento e tabata envolvi, mayoria tempo den comision di deporte y guiando e muchanan aspirant. “Mi por bisa cu mi a lanta e bario for di soño pa loke ta deporte, mi a lanta softbol, futbol, baseball y hopi mas,” Kelly a bisa. El a gradici masha hopi pa e honor duna na dje, pero tambe a elogia Prome Minister Eman, kende semper a coopera cu nan organisacion.

Prome Minister Mike Eman mes ta sinti un orguyo hopi grandi pa e tipo di proyectonan aki, cu a wordo mira pa prome biaha na Aruba na Centro di Bario Brazil. “Awe ta un dia hopi agradabel pa nos tur y sigur pa esnan cu ta haci uzo di e facilidadnan di CBAB pa e diferente deportenan. Algun aña pasa mi a siña conoce CBAB di cerca, su necesidad, aspiracion y soñonan. Unda cu nos tabata por, a traha hunto cu Antoine Kelly riba e parti di cancha pa baseball.” Asina tambe, e mandatario a splica, a bini dilanti e deseo grandi di un mini cancha deportivo cu yerba artificial na Ayo. “Nos a traha duro pa haci esaki posibel y nos a haya Comite Olimpico disponibel pa yuda den e proyecto aki. Specialmente sra. Nicole Hoevertsz, kende recientemente a wordo nombra den un comite ehecutivo di Comite Olimpico Internacional, loke ta un posicion hopi halto y nos ta super orguyoso cu un Arubiano a logra e puesto aki.”

Inauguracion di e mini cancha deportivo ta un momento hopi importante pa Ayo pasobra e Centro di Bario su actividadnan por wordo amplia, tanto den deporte como esun di recreo. No solamente e cancha a wordo inaugura, pero tambe recientemente a wordo estrena diferente careteranan asfalta, pa cual a spera hopi aña prome cu el a bira realidad y tambe iluminacion di diferente area den e bario. “Pa nos ta un momento pa bisa cu gobierno tey pa scucha, coopera y traha hunto cu e bario. E proyecto aki ta demostra cu den demostracion cu diferente instituto por traha pa un bon bario.”

E seis canchanan mini turf ta wordo realisa cu patrocinio di e Programa Olympamerica di e Organisacion Deportivo Panamericano atrabes di Comite Olimpico Arubano bou presidencia di sr. Roy Mezas.

LEAVE A REPLY

Please enter your comment!
Please enter your name here