Roncado ta otro bario cu a haya iluminacion di caya danki na programa “Luz den Bario”

0
481

ORANJESTAD – Tabata reina un entusiasmo grandi bou habitantenan di e bario Roncado na Paradera despues cu Roberto Lejuez a cende e prome luz LED di caya. Bou aplauso el a baha for di e vehiculo di ELMAR unda el a wordo ricibi pa Prome Minister Mike Eman, iniciador di e programa Luz den Bario.

Siman pasa luz a yega na un otro bario di Aruba, danki na e maneho di Gabinete Mike Eman II di cambia tur luz di caya pa LED, cu ta uno mas eficiente y ta baha e gastonan. “Enbes cu nos ta paga menos placa na ELMAR pa e coriente di luz di caya, nos a mantene e presupuesto ey y pone puntonan di iluminacion nobo den barionan cu ta biba den scuridad, manera Roncado,” Eman a splica e habitantenan presente.

Habitante Stanley Nieuwkerk tabata hopi contento cu e luz den bario di Roncado y a gradici e mandatario den nomber di e habitantenan. “MinPres masha danki. Hopi danki pa bin den nos bario, danki pa e luz cu nos tabatin hopi mester di dje door di e scuridad aki. Awo nos por cuminsa cana anochi tambe. Nos ta hopi contento di berdad”. Na mesun momento el a entrega un peticion di e habitantenan di e bario na Prome Minister Eman. Esaki ta un peticion pa pone asfalt den e caminda di tera cu ta pasa den e bario di Roncado. Ya caba, segun Nieuwkerk, a yega di haci un peticion similar na un otro Gobierno, pero ta spera cu awo nan peticion lo bira realidad. “Nos ta masha agradecido, y nos sa cu trabou tin y ainda falta. E luz tabata un sorpresa, pero hopi agradecido. Sigui haci e bon trabou,” Nieuwkerk a bisa.

Habitantenan manera Elizabeth Roja y Roberto Lejuez a expresa nan felicidad pa yegada di luz. “Mi ta hopi contento pasobra a wordo priminti cu nos lo haya luz y el a yega. Awo nos ta spera riba e asfalt. Nos sa cu e por tarda un rato, pero nos ta haye si. Nos ta sigui confia riba e partido berde.” Roberto Lejuez di su banda a bisa cu e mes tin 8 aña bibando ey y ta danki cu e bisiñanan ta pega cu otro, cu e scuridad por a wordo wanta. “Awor cu luz esaki ta mehora e calidad di bida di tur esnan bibando eybanda.”

Prome Minister Mike Eman a bisa e habitantenan cu e luz pa bario ta un obligacion di Gobierno, pero cu e ta contento cu ora nan cumpli cu un obligacion, esaki ta wordo aprecia. “Danki pa bini hunto awe nochi pa nos celebra e momento aki,” el a bisa e publico presente. “Nos prioridad ta pa mira con nos por trece un miho calidad di bida den tur bario di Aruba.” El a papia di e diferente proyectonan cu a haci pa barionan manera luz, troittoir, mini cancha deportivo, asfalt, verkeersdrempel, embeyecemento di area, infrastructura y mucho mas.

LEAVE A REPLY

Please enter your comment!
Please enter your name here