Sector di Ponton awo ta mas sigur danki na verkeersplateau

0
214

ORANJESTAD – Diamars anochi Prome Minister Mike Eman a pasa na Tuturutustraat na Ponton caminda Departamento di Obranan Publico (DOW) tabata construyendo un verkeersplateau. Di e manera aki e programa BoBario di Ministerio di Asuntonan General hunto cu Ministerio di Infrastrutura ta traha pa cumpli cu e deseo di habitantenan pa un bario mas sigur den trafico.

E presencia di Minister President Mike Eman, manera e mes a splica na mas di un ocasion, ta pa wak personalmente cu e promesa haci dor di su Gobierno na e bisiñanan ta wordo cumpli, pero sigur tambe ta pa brinda un sosten moral na e trahadornan di DOW cu ta traha di anochi pa marduga realisando e obra importante aki pa nos comunidad.

“Hopi contento di ta awenochi na Ponton compañando e ekipo dinamico y sumamente dedica di DOW cu ta trahando e verkeersplateaunan cu ta den demanda tur rond di Aruba,” asina Premier Eman a bisa. Trahadornan tambe ta reacciona positivamente riba su presencia pasobra por mira con nan ta ricibi’e cu brasa, sonrisa y ta combersa amenamente; ta trat’e casi como un colega mas.

Verkeersplateau ta entre e peticionnan mas comun, despues di asfalt, acera y luz; ora cu Prome Minister Mike Eman ta bishita tur siman otro bario di nos isla. “Ta wordo hopi puntra pa nos pone verkeersplateau den e barionan caminda cu e autonan ta core sumamente duro y pa hopi ciudadano, e verkeersplateau ta trece seguridad,” e mandatario ta splica.

Ademas di por contribui na un miho calidad di bida den bario, Minister Mike Eman ta sumamente satisfecho y orguyoso di wak cu ta e propio departamento di infrastructura ta traha e verkeersplateaunan aki cu ta di calidad y a percura pa no stroba e trafico trahando durante anochi. Rondona pa e trahadornan di DOW, Premier Eman a expresa su gradicimento bisando: “Hopi danki y Aruba pabien. Asina e trabounan ta continua paso ainda falta!”

LEAVE A REPLY

Please enter your comment!
Please enter your name here